Ginalantaw nga sa Marso pa ipatuman sang Department of Agriculture (DA) ang maximum suggested retail price (MSRP) para sa karne sang baboy.
Santo sa latest monitoring sang ahensya, nagatupa sa P380 tubtub sa P480 per kilo ang presyo sang liempo samtang yara naman sa P350 tubtub sa P420 ang presyo sang kada kilo sang kasim ukon pork ham.
Sang naglibot ang DA kag ang Department of Trade and Industry on Wednesday, ginpamangkot ni Agriculture Secretary Francisco Tiu Laurel Jr. ang retailers kun ngaa mataas gihapon ang presyo. Paathag nila, may ahente pa sila nga kinahanglan bayaran, gasolina, mga tawo, kag pag-ihaw magluwas pa sa farmgate price.
Suno kay Laurel, tun-an sang maayo ang value chain para nga maanalisar gid sang DA.
Nagatipon pa subong ang ahensya sang dugang nga impormasyon apang suno sa tiglikom, sigurado nga dayunon nila ang implementasyon sang maximum suggested retail price.
Ginalauman nga makumpleto ang ila nga data-gathering antes magtakop ang Pebrero.
Una naman nga ginpasalig sang DA nga bisan mataas ang presyo sang karne sang baboy, bastante ang suplay sini diri sa Pilipinas.
