Gin-reschedule sang Duterte Campaign Team Western Visayas ang ila pagahiwaton kontani nga campaign rally sang Team Duterte kag Partido Demokratiko Pilipino Lakas ng Bayan (PDP Laban) sa La Paz Freedom Park in La Paz, Iloilo sa Marso 1, 2025.
Sa interview sang Bombo Radyo kay Atty. Hansel Didulo, spokesperson sang campaign team sang Duterte, iya ginpahayag nga nakatalana na kuntani nga magpatuman sang traffic scheme ang Iloilo City Traffic Management Unit (ICTMU) apang, gin-isol ang petsa sang amo nga kahiwatan.
Suno kay Didulo, nakakuha na sila sang permit para sa caravan kag rally kon sa diin, nahatag na man sa ila sang Pebrero 24, 2025.
Apang, gin-anunsyo sang national nga bahin sang Duterte Campaign Team nga i-reschedule ang petsa sa bulan sang Abril.
Gin-ako man sini nga wala siya nakahibalo sang rason sang rescheduling apang ginpasigurado sini nga madayon na sa Abril.
Nahibaluan nga ang Iloilo City lang gid ang syudad nga tuyo padulongan ni Former President Rodrigo Duterte sa Western Visayas kadungan man sa paghiwat sang rally sa pila ka lugar sa rehiyon.
