Daku ang tyansa nga malakip liwat ang boxing sa listahan sang sports sa Los Angeles Olympics sa 2028.
Ini matapos naghatag na ang International Olympic Committee (IOC) sang provisional recognition sa World Boxing, isa ka organisasyon nga ginlunsar sang 2023 kag may yara sang 78 ka mga miyembro sa lima ka mga kontinente.
Nalakip sa mga pungsod nga sa idalom sang World Boxing amo ang United States, the United Kingdom, France, Germany, Australia kag Brazil.
Suno sa Olympic body, nalab-ot sang World Boxing ang pila ka nagapanguna nga criteria rason nga ginhatagan ini sang provisional recognition.
Madumduman nga naalang-alang ang paglakip sang boksing sa masunod nga Olympiada bangud ginkakasan sang IOC sang recognition ang International Boxing Association (IBA) bangud napaslawan nga magbag-o sa pagdumala, may isyu man sa finance amo man sa ethics.
Magluwas sa sini nga isyu, nagsumpakilay man ang Olympic body kag ang federation sang nagligad nga Olympics bangud sa partisipasyon sang duha ka mga babaye nga boksidor nga sanday Imane Khelif sang Algeria kag Lin Yu-ting sang Taiwan.
Gin-ban sila sang IBA sa 2023 World Championships kasunod sang chromosome test kag gin-cite ang ineligibility issues, apang gintugutan naman sila sang IOC nga mag-compete sa Paris kag pareho man nga nagdaog sang gold medals.
Kasunod sini nga mga isyu, ginduso sa national boxing federations nga maghimo sang bag-o nga global boxing body kag nagpaandam nga kun indi ini matigayon, wala sang boksing nga makit-an sa Olympics sa 2028.
Kun dalayon nga maaprubahan para sa Olympics, maayo nga balita ini para sa Pilipinas bangud halin sa boxing team ang sunod-sunod nga medalya nga nakuha sang pungsod sa magkasunod nga edisyon sang Olympiada sa Japan kag sa France.
