Ginsuportahan ni Senate Deputy Minority Leader Risa Hontiveros ang pahayag ni Senate Minority Leader Aquilino Pimentel III nga dapat indi na maglaminday ang Senado kag aktuhan na gilayon ang impeachment case batok kay Vice President Sara Duterte.
Suno kay Hontiveros, bisan nga may gin-cite si Senate President Francis Escudero nga procedural concerns kaangot sa session break ukon recess sang Senado, wala sang legal impediment ukon nagapugong sa ila nga mag-proceed sa trial ukon diskusyunan na ang articles of impeachment kag magtingob bilang impeachment court.
“Walang pumipigil sa amin na i-tackle yung articles of impeachment at mag-constitute bilang impeachment court,” suno sa senadora.
Kun basehan ang statement sang senate president, mahimo nga magsugod ang proceedings sa Hunyo pagkatapos sang legislative break bangud sa Hunyo 2 pa magabalik ang sesyon.
Apang suno naman kay Hontiveros, indi na kinahanglan nga maghulat sang apat ka bulan bangud may risgo ini nga i-atrasar man ang hustisya.
Gina-abi-abi man ni Hontiveros ang plano nga magpatigayon sang caucus ang mga senador para nga mahambalan ang impeachment trial.
“Sana dun sa caucus na yun, mapakinggan ng aming mga kasama ang mga argumento ni Senator Koko (Pimentel) kung bakit di lamang pwede kundi dapat mag-convene na kami bilang impeachment court para i-treat, i-tackle yung articles of impeachment,” dugang sini.
Nahibaluan nga samtang palapit ang midterm elections, nagatunog ang mga espekulasyon nga naga-alang-alang ang re-electionist senators nga umpisahan ang impeachment trial bangud sa kahadkok sa political repercussions.
Kun madayon ang impeachment trial sa senado, mahimo ini mag-resulta sa pagkakas sa bise-presidente sa opisina kag sa iya nga perpetual disqualification from office.
Pebrero 5 sang gin-impeach sang Kamara ang vice president nga amo man ang adlaw nga nagtakop ang session sa Kongreso para sa eleksyon.#
