Ginpanindugan sang Malacañang nga wala sang pagbag-o sa panindugan ni President Ferdinand ”Bongbong” Marcos Jr. kaangot sa Typhon missile sang Estados Unidos sang Amerika nga yari diri sa Pilipinas.
Ini kasunod sang pagpanawagan liwat sang Chinese state media sa Pilipinas nga i-withdraw na ang Typhon intermediate range missile halin sa West Philippine Sea. Ginsulit man sini nga wala nagtuman ang Pilipinas sa promisa sini sang ginpatinir sini ang amo nga missile system diri sa Pilipinas.
Suno naman kay Palace Press Officer Undersecretary Atty. Claire Castro, kun may demand ang China, may counterdemand man ang Pilipinas, kag amo ini ang una na nga ginbuy-an sang presidente.
Matandaan nga una na ginsiling ni Marcos nga handa siya nga i-pull out ang Typhon missiles kun untaton man sang China ang pag-claim kag ang pagpang-harass sa West Philippine Sea.
“Let’s make a deal with China: Stop claiming our territory, stop harassing our fishermen and let them have a living, stop ramming our boats, stop water cannoning our people, stop firing lasers at us, and stop your aggressive and coercive behavior, and I’ll return the Typhon missiles,” suno anay kay Marcos.
Nalakip sa Typhon missile system nga ginadumtan sang China amo ang Tomahawk cruise missiles. Maigu sini ang targets sa China kag Russia, samtang ang SM-6 missiles naman ang makasarang sa air or sea targets nga masobra sa 200 kilometers ang kalayuuon kun ipalupad halin sa Pilipinas.
