Gina-imbestigaran na sang Philippine National Police (PNP) ang report kaangot sa mga espiya sang China nga ginaalegar naka-donar pa sang salakyan sa duha ka police units kag isa ka local government unit (LGU).
Suno kay PNP-Criminal Investigation and Detection Group (CIDG) chief Major General Nicolas Torre III, nakamandu na si PNP Chief Gen. Rommel Francisco Marbil nga lantawon ang mga sirkumstansya nga nakapalibot diri kag kun ano ang puno kag punta sang mga hitabo.
Samtang nagapadayon ang news briefing, ginpatawag man ni Marbil si Torre sa Camp Crame apang indi klaro kun nalakip sa ila diskusyon ini nga ginaalegar nga mga donasyon.
Nag-ugat ini sa exclusive report sang Reuters nga ang Chinese nationals nga ginaakusaran sang Philippine government sang pagpang-espiya amo ang mga lider sang civic groups nga may kaangtanan sa foreign influence network sang Chinese Communist Party.
Gin-identify ang Chinese nationals nga sanday Wang Yongi, Wu Junren, Cai Shaohuang kag Chen Haitao nga lunsay na naaresto sang awtoridad sang nagligad nga bulan.
Isa ang ginaalegar natabo sa Manila kun sa diin tatlo sa Chinese nationals ang nag-donar sang 10 ka motorbikes sa police force sang syudad.
Sa amo man nga bulan, ang isa pa ka Chinese national ang naghatag man sang 10 ka patrol vehicles sa Tarlac police kag sa city government.
Pahayag naman ni Torre, may yara sang guidelines nga ginasunod ang PNP sa pagbaton sang mga donasyon halin sa iban nga mga pungsod kag kun ini ang halin sa non-government organizations.
Kun halin ini sa iban nga pungsod, may yara ang PNP sang foreign liaison division nga nagakuha sang direction halin sa Department of Foreign Affairs. Kasunod sini, ipaagi pa ini sa Department of the Interior and Local Government.
