Nakahanda ang Criminal Investigation and Detection Group (CIDG) nga magpatuman sang warrant of arrest kun magpaguwa na ang Sandiganbayan batok kay Senador Rodante Marcoleta apisar pa sang nangin protesta sang Iglesia ni Cristo (INC).
Suno kay Colonel John Guiagui, chief sang CIDG sa National Capital Region (NCR), wala pa sila sang may nabaton nga warrant of arrest batok sa bisan sin-o nga mataas nga opisyal sang gobyerno.
Apang ginhambal niya nga handa ang CIDG kag ang bug-os nga Philippine National Police (PNP) nga magserbe sang warrant kon ini mapagwa na sang korte.
“But again, it is a mandate of CIDG. If there is one, just like the previous cases, CIDG is ready to implement and serve any warrant that will be given by the court,” suno sa opisyal.
Subong nga adlaw sang gin-file sang Office of the Ombudsman ang non-bailable plunder complaint batok kay Marcoleta may kaangtanan sa gin-aalegar nga P75-million nga donasyon nga iya nabaton sang kongresista pa siya antes nagdalagan bilang senador sa eleksyon sang 2025. Wala niya ginsapubliko ang amo nga donasyon.
Sa temprano nga bahin sini nga semana, ginpahayag ni Ombudsman Jesus Crispin Remulla nga iga-file na ang kaso batok kay Marcoleta. Pagkasunod nga adlaw, nagprotesta ang mga miyembro sang INC bilang suporta sa senador nga isa man ka miyembro sang relihiyoso nga grupo.
Ginpakamalaot nila ang ginapaabot nga kaso kag gintawag ini nga “selective justice.”
Sang ginpamangkot kon paano ipatuman sang CIDG ang posible nga warrant of arrest apisar sang protesta, nagsiling ang CIDG nga nagakinahanglan ini sang maathag nga preparasyon kag koordinasyon sang bug-os nga Philippine National Police.
Ginpasiguro ni Guiagui nga padayon ang operasyon sang CIDG sa pagpangita kag pagdakop sa iban pa nga mga akusado nga nagapabilin nga nagapalagyo may kaangtanan sa mga kaso sang flood control corruption scandal.#
