Ginmandu sang Sandiganbayan Third Division nga dal-on subong nga adlaw, Hulyo 14, si Senador Rodante Marcoleta sa UP-Philippine General Hospital (UP-PGH) agud ipaidalom sa independent medical examination.
Ini matapos ideklarar sang mga doktor sang Philippine National Police ukon PNP General Hospital nga fit to travel na ang nasambit nga senador.
Suno kay PNP General Hospital Internal Medicine Department chief Police Lieutenant Colonel Benaly Bayani, clinically stable na si Marcoleta kag kontrolado na ang iya blood pressure.
Base sa resolusyon sang korte nga may petsa Hulyo 13, ginhatagan sang direktiba ang mga opisyal sang PNP nga dal-on si Marcoleta sa UP-PGH para sa medical examination kag ibalik gilayon siya sa PNP General Hospital pagkatapos sini.
Ginpapasa man sang Sandiganbayan si UP-PGH Director Dr. Gerardo Legaspi ukon ang iya awtorisado nga representante sang medical report kag rekomendasyon sa Hulyo 15 kag mag-atubang mismo sa korte upod sa mga doktor nga nag-usisa agud magtestigo sa resulta sang ila medical examination.
Matandaan nga ginkwestyon sang isa ka mahistrado sang Sandiganbayan kun ngaa gintugutan nga may makabisita kay Marcoleta bisan nagrekomendar ang mga doktor nga kinahanglan siya nga ma-isolate bangud sang iya mild pneumonia.
Sa hearing sang nagligad nga Biyernes, ginpamangkot ni Associate Justice Ronald Moreno kun ngaa may mga bisita kaangay kanday Vice President Sara Duterte kag Senador Robinhood Padilla magluwas pa sa iya mga abogado kag pamilya.
Suno kay Bayani, ang CIDG ang nagadesisyon kon sin-o ang mahimo makabisita sa senador.
Sang pamangkuton sang korte kon tugutan pa ang mga bisita sa masunod nga mga adlaw, nagsabat si Bayani nga makigkoordinar siya sa CIDG kag indi na anay pagpasudlon ang mga bisita kay Marcoleta.
