Nagpadala sang sulat ang Iloilo City Government sa Department of Public Works and Highways (DPWH) Region 6 nga naga-ayo sa Iloilo City District Engineering Office nga magpasa sang financial standing sang mga ‘unfinished project’ sa syudad.
Sa interview sang Bombo Radyo kay Joy Fantilaga, spokesperson ni Iloilo City Mayor Jerry Treñas, iya ginpahayag nga ini ang nangin tikang sang syudad matapos man nga wala nag-attend si ICDEO Head Roy Pacanan.
Ini kasunod man sang pagpatawag sang city government sang pagsinapol nga patigayunon kuntani kahapon, Byernes, Marso 7, 2025.
Naghulat naman ang city government sa mga ipadala nga staff sang Iloilo City District Engineering Office, apang wala gid sang may nag-abot
Suno kay Fantilaga, ginkadismaya gid sang alkalde ang nangin lihok sang talatapan.
Una na nga ginpahayag ni Treñas nga gapamangkot lang man siya kon may budget pa gidman agud nga mapadayon sang syudad ang wala natapos nga mga pasilidad.
