Patay ang 14 ka mga tawo kag pilason ang 37 ka iban pa lakip ang kabataan bangud sa missile and drone attacks sang Russia sa eastern city sang Ukraine sa Dobropillia.
Gin-atake man ang Kharkiv region sang nagligad nga gab-i suno sa Ukrainian Interior Ministry.
Suno sa Kyiv, nag-atake ang Moscow sa Dobropillia gamit ang ballistic missiles, multiple rockets, kag drones rason nga nagkalaguba gid ang walo ka multi-storey buildings kag 30 ka mga salakyan. Sang ginpatay sang mga bumbero ang kalayo sa mga building, nag-atake liwat ang Russian forces kag ginpuntariya naman ang mga fire truck.
Sa Kharkiv, tatlo ka mga sibilyan ang napilasan.
Suno kay President Volodymyr Zelenskyy, pamatuod ini nga wala nagabag-o ang tuyo sang Russia gani nga dapat pabakuron sang Ukraine ang ila nga air defense kag dapat man nga dagdagan sang sanctions ang Russia para nga mag-collapse ang tanan nga naga-pondo kay President Vladimir Putin para sa gyera.
“Such strikes show that Russia’s objectives have not changed. Therefore, it is crucial to continue to do our best to protect lives, strengthen our air defences, and increase sanctions against Russia. Everything that helps Putin finance the war must collapse,” santo sa post sang Ukrainian leader sa Facebook.
Sang Byernes, matandaan nga nagpaulan man ang Russian forces sang missiles sa Ukrainian energy and gas infrastructure — una nga major missile attack sang Russia halin sang gin-untat sang US ang intelligence sharing sa Ukraine kag gin-untat man ang military aid bangud sa pagbaisay ni Trump kag Zelensky sa Oval Office sa White House.
