Magapadayon ang impeachment trial kay Vice President Sara Duterte bisan imbitaron siya sang International Criminal Court (ICC) sa ila imbestigasyon sa war on drugs sang iya amay nga si anay Presidente Rodrigo Duterte.
Ini ang ginpahayag sang isa sa mga piskal sang Kamara para sa impeachment trial ni VP Sara, nga si Manila 3rd district Rep. Joel Chua sa isa ka press conference subong nga Lunes, Marso 10.
Apang gin-ako sang mamalidha nga posible ma-delay ang trial kun malakip sa ICC arrest warrant ang Bise Presidente kag dal-on sa The Hague, Netherlands kun sa diin nakabase ang ICC sa tion nga ma-execute na ini.
Una na nga gintawag ni Chua nga “set-up program” ang kahiwatan nga ginpatigayon nanday anay Presidente Rodrigo Duterte kag anak sini nga si Vice President Sara Duterte sa Hong Kong.
Ginatumod sang mamalidha ang “Thank you PRRD with OFWs” nga kahiwatan nga ginhiwat sa Southorn Stadium sa Wan Chai, Hong Kong sang Dominggo, Marso 9.
Ginpahayag sang natungdan nga indi mga OFWs in general ang nagtambong sa amo nga kahiwatan kundi mga katapo sang Kingdom of Jesus Christ (KOJC).
Una na nga nagtuhaw ang espekulasyon nga posible ginalikawan sang anay Presidente ang posible arrest warrant batok sa iya sang International Criminal Court (ICC) sa tion sang iya pagbiyahe sa HK, bagay nga ginpahayag sang anay chief presidential legal counsel ni Duterte nga si Atty. Salvador Panelo.
