Indi makapati si Senator Imee Marcos nga ang pag-abot ni anay Presidente Rodrigo Duterte sa Pilipinas gikan sa Hong Kong nagresulta sa pagka-aresto sa iya.
Una diri, ginkumpirmar sang Malacañang nga naaresto si Duterte base sa warrant for crimes against humanity sang International Criminal Court.
Suno kay Sen. Imee Marcos, nakibot siya kag naluoy sa anay presidente bangud tigulang na ini.
Dugang pa sang senador nga wala na nadudla ang tanan kag nagatuga lamang sang gamo.
Ginpahayag man sini nga wala sang benepisyo ang mga pagbinaisay sa pulitika sa mga imol sa pungsod.
Samtang, nagalaum naman si Senador Risa Hontiveros nga may mahambal ang Malacañang kag magasugot sa hingyo sang International Criminal Court, pinaagi sa Interpol, kag masiguro nga mahatag ang hustisya.
Nagapati man ni Hontiveros sa pahayag ni Duterte sa tion sang Senate hearing nga “under oath” kag dal-on niya ang kaso sa International Criminal Court kag bilang isa ka abogado, sundon niya ang proceedings.
Nagapangamuyo naman subong si Senator JV Ejercito para sa Pilipinas matapos nadakpan si Duterte.
Nagpabutyag man sang kasubo ang senador sa indi paghiliusa sa tanan nga suno sa iya nagapabudlay sa pag-uswag sang Pilipinas.
Nagpanawagan naman si Senador Christopher “Bong” Go sa mga pumuluyo nga ipangamuyo ang sitwasyon ni Duterte subong.
Ginpangabay ni Go sa mga Pilipino nga ipangamuyo ang kaayuhan kag ikaayong lawas sang anay presidente.
