Ginkumpirma sang Vatican nga makaguwa na sa ospital si Pope Francis matapos nga nag-ayo na ini sa double pneumonia.
Matabo ini Marso 23, Domingo, oras sa Roma.
Suno sa medical team sang 88-anyos nga Santo Papa, igabalik na sa Vatican ang Pope apang kinahanglan sini gihapon ang duha ka bulan nga pagpahuway bangud maluya na ang iya lawas dala man sang iya nga edad.
Gin-abisuhan man ang Pope nga indi anay magpatigayon sang dalagku nga meetings kun sa diin kinahanglan gid sini ang pagpamwersa ukon anuman nga special effort. Base sa mga doctor, wala na ini sang pneumonia apang wala pa ini nag-ayo sa complex infection nga naga-involve sang microorganisms.
Suno kay Dr. Luigi Carbone, vice director sang Vatican healthcare service, may maga-upod nga nurse kay Pope samtang yara sa iya nga Vatican residence.
Kumpirmado man nga patigayunon man sini nga Domingo ang una nga public appearance ni Pope agud maghatag sang blessing halin sa bintana sang iya hospital room antes siya i-discharge.
Matandaan nga isa ka bes lamang nakit-an ang Santo Papa samtang yara sa ospital, kag ini amo ang picture nga gin-release sang Vatican sang nagligad nga semana samtang nagapangamuyo ini sa hospital chapel.
Pebrero 14 sang gindala si Pope sa ospital bangud sa severe respiratory infection, sang ulihi na-diagnose nga may double pneumonia, kag nagsuprer sang apat ka acute attacks ukon “respiratory crises”.
Sa apat ka mga atake nga ini, duha ka beses nga kritikal ang natabo nga nagbutang sa iya kabuhi sa katalagman.
