Hugot nga ginpanginwala ni Vice President Sara Duterte nga nagbuya siya sang pahayag nga nagapanawagan kay President Ferdinand Marcos nga mag-resign sa pwesto, kag ginsiling nga sa mga tawo naghalin ang panawagan.
Suno kay VP Sara, ang ginhambal lang niya amo nga kun nagapanawagan ang mga tawo sang ‘BBM resign,’ dapat hatagan siya sang rason kun ngaa ini ang panawagan sang mga tawo.
Ang ginatumod ni Duterte amo ang pagtililipon nga iya gintambungan sa The Hague, kun sa diin ginasinggitan sang mga supporters ni former president Rodrigo Duterte ang “Marcos resign!” kag ginsiling ni VP Sara nga ang mga tawo ang naghambal sini kag indi siya.
Samtang, ginpahayag naman sang bise presidente nga nagahanda na ang iya legal team para sa impeachment trial samtang masako ini sa legal nga preparasyon sang iya amay sa The Hague.
Suno sa bise presidente, sa subong indi pa niya mabayaan ang amay tubtob nga indi mangin pinal ang legal team sini sa trial sa International Criminal Court bangud sa crimes against humanity charges.
