Nagpangabay ang Malacañang sa pila ka grupo sang overseas Filipino workers (OFWs) sa Europa nga mangin kalmado sa tunga sang pamahog sang mga tagasuporta ni anay presidente Rodrigo Duterte nga “zero remittance week.”
Nagpaandam ang pila ka grupo sang OFW sa Europa nga indi sila magpadala sang kwarta sa Pilipinas umpisa Marso 28 tubtob Abril 4, 2025.
Ang zero remittance week amo ang protesta nila sa ginhimo nga pag-aresto kay Duterte, nga naka-detain subong sa The Hague para ipaidalom sa trial sa International Criminal Court (ICC) bangud sa crimes against humanity charges.
Ang amo nga kaso ang bangud sa ginpatuman nga kampanya ni Duterte batok sa sa ilegal nga droga kun sa diin linibo ang nagkalamatay.
Sa press briefing nga ginpatigayon ni Palace Press Officer Undersecretary Claire Castro, ginpahanumdom niya nga maapektuhan man sang “zero remittance week” ang mga pamilya sang OFWs.
