Nagsaka na sa 1,644 ang nagkamatay matapos ang magnitude 7.7 nga linog nga nagtay-og sa Myanmar sang Byernes nga ginsundan pa sang 6.7-magnitude nga aftershock.
Suno sa Myanmar military government, masobra sa 3,400 ang ila naisip nga nasamaran kag 139 pa ang missing.
Ang may pinakadaku nga halit amo ang Mandalay nga amo ang ikaduha sa pinakadaku nga syudad sa Myanmar kag malapit gid sa epicenter sang linog.
Suno naman sa UN Office for the Coordination of Humanitarian Affairs, mabudlay gid ang pagdala sang mga ayuda kag bulig bangud sa guba nga mga dalan kag imprastraktura. Nagapadayon pa subong ang pagpangkutkot sa nag-collapse nga mga building para nga makit-an ang missing nga mga indibidwal.
Base naman sa U.S. Geological Survey, posible nga maglab-ot sa 10,000 ang death toll sa amo nga South East Asian country.
Ang Junta chief nga si Min Aung Hlaing —nga talagsa lang naga-kooperar sa iban nga mga pungsod —ang nauna na nga nag-isyu sang apelar nga buligan sila sang international community sa tunga sang ila deklarasyon sang state of emergency.
May initial aid delivery na halin sa India; nagpadala man ang China sang masobra 80 rescuers kag nagpasalig sang $13.8 million sa emergency assistance; samtang may promisa man ang US nga foreign assistance.
Sa Pilipinas, ginahanda naman sang gobyerno ang humanitarian aid nga ipadala man sa Myanmar. Ang tentative travel date para sa deployment sang masobra 100 ka mga personnel ang gintalana sa April 1, 2025 kag possible maglawig sang duha ka semana suno sa Office of Civil Defense.
