Naga-selebrar ang Filipino Muslims subong nga adlaw, Marso 31, sang Eid’l Fitr ukon ang Festival of Breaking the Fast nga amo ang adlaw nga nagamarka sang pagtakop sang balaan nga bulan sang Ramadan.
Gin-anunsyo ini ni Bangsamoro Grand Mufti Sheikh Abdulrauf Guialani matapos ginpatigayon sang assigned groups ang moon sighting sa pungsod.
Importante para sa mga Muslim nga makit-an ang mooncrescent antes tumuron kun san-o ang Eid’l Fitr bangud amo ini ang nagamarka sang panugod sang bag-o nga lunar month sang Shawwal nga amo ang ika-napulo nga bulan sa Islamic lunar calendar.
Ang Eid’l Fitr nga isa ka Islamic festivity ang tradisyonal nga ginselebrar sa sulod sang tatlo ka adlaw nga gina-umpisahan sang pagpangamuyo sa mosque sa kaagahon, pagtilipon sang magpamilya kag mag-abyan, kag pagkaon kag pagbayluhanay sang mga regalo.
“In spirit, the Festival of Breaking the Fast is more than a celebration; it is a testament to our desire for shared humanity, strengthening bonds of family and friendship, as well as unity among our peers… Beyond the values that Ramadan emphasized, let us continue to be inspired to extend our hands in service, uplift those in need, and help find joy in those who seek it,” kabahin sang mensahe ni President Ferdinand Marcos, Jr. bilang pag-upod sang selebrasyon sang Muslim community.
Kun matandaan, nauna na nga gindeklarar sang Malacañang ang Abril 1 ukon buwas, Martes, bilang holiday kaangot sa obserbasyon sang Eid’l Fitr.
Sa Saudi Arabia nga amo ang heartland sang Islam, gin-umpisahan ang selebrasyon sang Eid’l Fitr kahapon.
