Gin-athag ni Iloilo City Mayor Jerry Treñas nga wala siya nakamensyonar sang pangalan ni former Mayor Jed Patrick Mabilog kag Iloilo City Lone District Representative Jamjam Baronda nga nagaangot bilang protector kag pinansyer sang iligal nga druga sa syudad.
Sa interview sang Bombo Radyo kay Mayor Treñas, iya ginkatingala kon ngaa daw apektado gid ang duha ka mga lideres sang Team Sulong Gugma.
Suno sa alkalde, ang pagbalik sang protektor kag pinansyer sang iligal nga druga sa Iloilo ang iya ginakabalak-an ilabi na nga nabansagan na ang syudad nga “Most Shabulized City”.
Ginlaragway man sang natungdan nga kon sin-o lang ang nakabatyag sa iya nangin pahayag, sila ang naiguan.
Nagdepensa man ini sa mga ginapahayag trolls sang ila kampo, kon sa diin, gintumod sini nga ang kampo ni Baronda ang may madamo nga trolls sa social media.
