Nagsabat ang Malacañang sa matunog nga panawagan nga magpa-hair follicle drug test si Presidente Ferdinand “Bongbong” Marcos Jr. kasunod sang liwat nga paggwa sang issue kaangot sa “polvoron video”.
Ang nasambit nga video ang napamatud-an na nga peke sa diin nagapakita sang isa ka tawo nga nagaanggid sa Presidente kag ginapahayag nagagamit sang cocaine.
Gin-usisa ni Presidential Communications Office (PCO) Undersecretary Atty. Claire Castro ang motibo kag legal nga basehan sang mga nagamando sang drug test, lakip na ang mga netizens, bloggers, kag former Presidential spokesperson Atty. Harry Roque.
“Ano ang batayan ng pag-hiling ng hair follicle test kay Pangulong Marcos? Ito ba ay batay sa isang akusasyon na siya ay gumagamit ng ilegal na droga?” pag-usisa ni Castro. “Kung may akusasyon, ang nag-aakusa ang may obligasyon na magpatunay.”
Dugang pa ni Castro, “Sa mga nagdedemanda ng test kay Pangulong Marcos, kailangang patunayan ninyo muna na siya ay gumagawa ng mali.”
Ang naglapta nga video, nga una nga ginpagwa sa isa ka Maisug rally sa Los Angeles sang 2024, ang ginkumpirma sang Philippine National Police (PNP) kag mga independent nga fact-checkers nga peke kag ginbag-o gamit ang artificial intelligence (AI) agud mangin kaangid ni Marcos.
Apang liwat nga nagtunog ang isyu sang ini ang nagwa kasunod sang testimonya sang vlogger nga si Vincent “Pebbles” Cunanan sa isa ka House Tri-Committee hearing kaangot sa fake news.
Suno kay Cunanan, si Roque ang utok sa pagpalapta sang video, nga ginapahayag ginapabugal pa sini sa isa ka pribado nga pagtililipon sa Hong Kong nga eksperto siya sa pagpatumba sang mga gobyerno.
Hugot naman nga ginpanginwala ni Roque ang akusasyon kag gintawag nga “scripted show” ang hearing, kag ginlaragway man nga wala sang pulos ang affidavit ni Cunanan.
“Wala akong kapangyarihan na pabagsakin ang gobyerno,” pahayag ni Roque. “Ang kapalaran ni Pangulong Marcos ay nasa mga kamay ng sambayanang Pilipino, hindi sa akin.”
Dugang pa ni Roque, ang video ang mahimo naghalin lang sa isa ka tawo nga malapit sa Presidente, bangud sa indi pagsanto sang pahayag ni Cunanan kaangot sa source kag una nga nagpalapta sang video.
