Nagresulta sa trahedya ang prusisyon sang mga tumuluo nga Katoliko sa Barangay Alangilan, Bacolod City kadungan sang Byernes Santo, Abril 18.
Pasado alas siyete sang gab-i, samtang nagapabalik na ang prusisyon sa simbahan, hinali nga gin-arado sang isa ka pribado nga salakyan ang mga tawo kag nag-dalahig pa pati sa police patrol vehicle.
Duha ang patay sa amo nga insidente — isa sa area, kag isa ang dead on arrival sa ospital.
Base sa interviews kag reports halin sa Bombo Radyo Bacolod, tuman ka dasig ang pula nga Toyota nga Inova sang nagapadulhog sa Barangay Granada kun sa diin ginbungguan sini ang tricycle nga nagtabog kaupod ang mga sakay sini kag nagtupa sa police patrol car sang Bacolod City Police Station 5.
Bangud sa mabaskog nga impact, ginpahayag nga nawasak gid ang wind shield sang patrol car kag nadunot man ang tricycle.
Nagtuyo pa nga magpalagyo ang pribado nga salakyan apang ini ang nadakpan man. Natukiban nga sakay sini ang lima ka Indian nationals. Ang driver kag ang nagapungko sa passenger seat ang gindala sa Doctors Hospital bangud sa naangkon nga samad, samtang ang tatlo ka iban pa ang yara sa karon sa paghinakop sang Bacolod Police Station 5.
Magluwas sa duha nga napatay bangud sa insidente, siyam ka iban pa nga tawo nga yara sa lugar ang nasamaran nga subong ginadapatan naman sang nagakaigo nga pagbulong.
(with reports from Bombo Radyo Bacolod)
