Kapin sa 250,000 ka mga tawo ang naghatag sang katapusan nga pagtahod sa nagtaliwan nga lider sang Simbahan Katoliko nga si Pope Francis sa sulod sang tatlo ka adlaw nga public viewing sa St. Peter’s Basilica sa Vatican City sa Rome, Italy.
Halin sa mga katoliko nga tumuluo gikan sa nagkalain-lain nga pungsod tubtob sa mga lideres sang simbahan kag pulitika, nagtambong sila sa 3 ka adlaw nga public viewing nga natapos sang Biernes sang gab-i, Abril 25, sang opisyal nga ginsirado ang lungon sang Santo Papa sa liturgical rites antes ang state funeral sa St. Peter’s Square kag paglubong sa bangkay sang Santo Papa sa basilica saguwa sang Vatican subong nga adlaw sang Sabado, Abril 26.
Sa nagligad nga tatlo ka adlaw, linibo ka mga nagakasubo kag naglinya kag naghulat sang inoras agud maghatag sang ila katapusan nga mga paalam kag maghatag sang ila pagtahod sa Santo Papa.
Bangod sang mas mataas sangsa ginapaabot nga kadamuon sang mga tawo nga nagabisita sa Vatican, ang oras sang pagbukas sang basilica ginpalawig tubtob sa tungang gab-i.
Samtang, mga 200,000 ka tawo ang ginalauman nga magatipon sa St. Peter’s Square kag tubtob sa 300,000 pa sa ruta nga magadala sang bangkay sang nagtaliwan nga Santo Papa halin sa Vatican pakadto sa iya lubong sa St. Mary Major basilica.
Kaangot sini, nagdeploy ang Italy sang masobra 2,500 ka mga police officers kag 1,500 ka mga soldado agud maghatag sang seguridad sa lubong subong nga adlaw nga ginalauman nga matapos alas 2:00 sang hapon, oras sang Roma ukon alas 8:00 sang gab-i, oras diri sa Pilipinas.
