Ginsaysay sang isa ka Ilonggo nga former fire personnel ang iya nasaksihan nga trahedya sa Vancouver, Canada kadungan sang pagtilipon sang mga Pinoy para sa Lapu Lapu Day Festival.
Sa interview sang Bombo Radyo kay Kenneth John Benedicto Leo, tumandok sang Pototan, Iloilo, iya ginpahayag nga tuman ka dasig sang mga hitabo kun sa diin nakabati sila sang pagsigabong nga amo na gali ang nagahagunos nga salakyan. Madasig man nga naglinupad ang mga lawas sang mga tawo kag tanan nga nabungguan sang SUV sa lugar.
Pahayag sini, natabuan nga nagkadto siya sa food truck pagkatapos sa last act sa concert sa festival, apang sang nakit-an sini ang tuman ka dasig nga salakyan, gilayon siya nga nakapahigad. Pananglitan ginkabos siya sang bisan tres segundos lang suno kay Leo, mahimo nga isa man siya sa nangin casualties.
Bangud sa iya training sa pagresponde sang miyembro pa ini sang Bureau of Fire Protection (BFP) diri sa Pilipinas, nagbulig man ini sa area kun sa diin gin-abisuhan sini ang mga kaupod nga indi pag-guyudon ang mga biktima bangud sa posible bali sa ila lawas. Wala siya sang dala nga first aid kit, gani nagbulig na lang ini kag iban nga mga Pilipino nga istoryahon ang mga biktima agud indi madulaan sang animo, i-stabilize ang liog, mag-check sang pulso, kag magtawag sa emergency number nga 911.
Pahayag sini, bisan nakaluwas siya, tuman ka traumatic ang amo nga insidente, kag madamo pa subong sa mga Pilipino ang yara gihapon sa state of shock.
Base sa latest data sang pulis sa Vancouver, 11 ang patay kag masobra 20 ang pilason sa amo nga insidente.
Nahingadlan naman ang 30-anyos nga suspek, napasakaan na sang murder charges, kag ginpahayag sang pulis nga may history sang mental health issues. Gin-athag sang awtoridad nga wala ini ginakabig nga isa ka akto sang terorismo.#
