Tun-an sang gobyerno, partikular ang regional tripartite wages and productivity board ang hingyo para sa mas mataas nga sweldo para sa mga mamumugon.
Sa pihak nga bahin, ginpasalig ni Presidente Ferdinand Marcos Jr., nga wala ginabalewala sang gobyerno ang hingyo nga mas mataas ang sweldo.
Ginpasalig ni Marcos sa mga mamumugon nga ginapamatian sang gobyerno ang ila mga pangabay kag siguraduhon nga matuman ini.
Apang, ginpahayag sang Presidente nga may mga butang nga dapat lantawon kon ano ang mangin epekto sang wage increase.
Suno sa Presidente, dapat ikonsiderar ang epekto sini sa pag-uswag sang negosyo, trabaho, kag sa ekonomiya sang pungsod.
Dugang ni Marcos nga manami pamatian ang mga matam-is nga promisa angut sa pagtaas sang sweldo, apang kinahanglan nga balansehon.
Ginpabugal sang Presidente nga 16 na ka mga rehiyon ang nagpatuman sang salary increase humalin sang Hunyo sang nagligad nga tuig.
Sa pihak nga bahin, ginpaambit sang Presidente ang nagkalain-lain nga mga programa sang gobyerno sa pagbulig sa mga Pilipino nga mapahagan-hagan ang ila pag-antos, ilabi na sa bahin sang pang-gastos.
