Ginahingyo ni Senate Deputy Minority Leader Risa Hontiveros sa Senado nga imbestigahan ang mga water concessionaires sa ila ginaalegar unprofitable joint venture agreements sa mga water districts.
Sa Senate resolution 1352 nga gin-file ni Hontiveros, nagpanawagan ang senador sa Senate Committee on Public Services nga magpatigayon sang imbestigasyon sa joint venture agreements sa tunga sang mga water districts kag mga pribado nga kumpaniya—nga nagaresulta sa indi nagakaigo ukon kulang nga supply sang tubig.
Ginhatagan punto ni Hontiveros nga ang iban sini nga mga kasugtanan ang nakit-an sang Commission on Audit (COA) nga “disbentaha” ukon indi benepisyo sa mga konsumidor.
Kinahanglan suno sa iya nga tan-awon ang mga water concessionaires bangud madamo nga mga Pinoy ang ginauhaw sa maayo nga serbisyo, ilabi na subong nga tig-ilinit.
Apisar nga gin-anunsyo sang Malacañang nga maga-file ini sang imbestigasyon sa gina-alegar kakulangan sang PrimeWater, ginpanindugan ni Hontiveros nga bastante na ang findings gikan sa mga audits agud mabasehan sang aksyon.
Ginhatagan man pagtamod sang senador nga bangud sa kakulang sang transparency kag maathag nga mga mekanismo sang accountability sa mga kasugtanan, nangin mabudlay para sa publiko nga huptan ang mga pribado nga concessionaires, water district boards, local water utilities administrations, ang National Water Resources Board, ang Commission on Audit, kag ang Public-Private Partnership Center nga may salabton.
Sang Abril 30, ginmando man ni President Ferdinand Marcos Jr. ang imbestigasyon sa PrimeWater kasunod sang madamo nga reklamo gikan sa mga konsumidor nahanungod sa ginaalegar indi maayo nga serbisyo sini.
Naglunsar man sang imbestigasyon ang Local Water Utilities Administration (LWUA) sa ginaalegar indi maayo nga serbisyo sang PrimeWater nga ginapanag-iyahan sang pamilya Villar.
Kalabanan sa operasyon sang PrimeWater yara sa Batangas, Cavite, Bulacan, Pampanga, Pangasinan, Cabanatuan, Tarlac, Camarines Norte, Subic, kag iban pa.
Apang, ang PrimeWater nagsiling nga bukas sila sa isa ka makahulugan nga paghambalanay upod sa Local Water Utilities Administration.
Sa statement nga ginpagwa sang kompaniya, ginpahayag sini nga nagapakig-angot na sila sa Local Water Utilities Administration agud masolusyunan ang mga isyu.
