Nagtipon liwat ang mga anak sang anay Presidente Rodrigo Duterte para sa isa ka Thanksgiving gathering nga ginpakigbahin ni Davao City 1st District Representative Paolo “Pulong” Duterte sa iya Facebook page.
Makita sa litrato nga upod ni Rep. Duterte sanday Vice President Sara Duterte kag Davao City Mayor Sebastian “Baste” Duterte.
Suno kay Pulong sa iya post: “Not everything will always go the way we want it to, but there is always something to be grateful for. Family meeting for Thanksgiving! See you all soon! We miss you Pa.”
Ginpakigbahin man ang litrato ni Veronica “Kitty” Duterte sa iya Instagram account.
Suno kay Rep. Duterte, ang pagtililipon isa ka pamaagi sang ila pamilya sa pagpasalamat sa pihak sang mga ginapangatubang nila nga problema.
Sa pihak sini, padayon nga yara sa kustodiya sang International Criminal Court (ICC) sa The Hague, Netherlands ang anay Presidente Duterte bangud sang kaso nga crimes against humanity nga konektado sa madugo nga kampanya kontra ilegal nga droga, ang Oplan Tokhang.
Base sa datos, kapin 6,000 ang napatay sa amo nga kampanya, pero ginakabig nga nagalab-ut sa 20,000 ang kabug-usan suno sa mga human rights groups.
Sa nagliligad nga 2025 midterm elections, nagbalik sa lokal nga politika ang pamilya Duterte kun sa diin gindeklarar nga nagdaug si FPRRD bilang alkalde sang Davao City, samtang si Sebastian Duterte ang bise alkalde, kag si Paolo Duterte ang napilian liwat nga representante sang una nga distrito sang Davao City.
