Temporaryo nga nagbiya sa pwesto ang prosecutor sang International Criminal Court (ICC) nga si Karim Khan.
Ini bangud nagahilapit na nga matapos ang imbestigasyon nga ginapatigayon sang United Nations Office of Internal Oversight Services batok sa iya bangud sa alegasyon sang sexual misconduct.
Suno sa opisina ni Khan, samtang naka-leave ini, ang iya duha ka deputy prosecutors amo ang magabulos anay sa iya nga mga trabaho.
Matandaan nga una na nga ginpanginwala ni Khan ang alegasyon sang misconduct sang gin-report ini sang nagligad nga Oktubre 2024.
Sang amo nga tion, madamo nga non-government organizations kag staff members sang ICC ang nagpanawagan sa iya nga magpanaog anay sa pwesto samtang padayon ang imbestigasyon, apang nagtinir pa ini sa posisyon tubtub subong nga bulan.
Nahibaluan nga si Khan amo ang nag-request agud nga madagdagan sang arrest warrant ang high-profile nga mga indibidwal lakip na si Russian President Vladimir Putin bangud sa ginasuspetsahan nga pag-deport sang kabataan halin sa Ukraine.
Siya man ang sa likod sang pag-isyu sang tribunal sang arrest warrant batok kay Israeli Prime Minister Benjamin Netanyahu bangud sa ginaalegar nga war crimes sa Gaza.
Si Khan amo man ang chief prosecutor sa alegasyon nga crimes against humanity batok kay former Philippine president Rodrigo Duterte nga subong didto sa The Hague, Netherlands.
Ini nga latest development ang ginalantaw nga pagpanghangkat nga gina-atubang sang ICC ilabi na sa tunga sang sanctions sang Estados Unidos sang Amerika nga ginpatuman ni President Donald Trump bangud sa imbestigasyon sini sa Israel kaangot sa Israel-Hamas war.
