Ginklaro sang Department of Education (DepEd) nga wala sang plano nga magdugang sang Grade 13 sa Senior High School sa palaabuton nga school year 2025–2026.
Suno sa ahensya, isa lamang ini ka ‘fake news’ nga nagalapta sa social media, partikular sa isa ka Facebook post nga may ara sang publication material nga nagaangkon nga may Grade 13 na sunod nga tuig.
Sa subong, Grade 11 kag Grade 12 lang ang opisyal nga lebel sang Senior High School sa basic education system sang Pilipinas.
Nagapahanumdom man ini sa publiko nga mangin maalamon sa pagbaton sang impormasyon halin sa social media.
Ginpahanumdom man sang ahensya nga para sa lehitimo nga impormasyon kag anunsyo, dapat lang magbisita sa opisyal nga social media accounts sang DepEd Philippines.
Ginplano nga magsugod ang klase sa Hunyo 16, 2025 kag matapos sa Marso 31, 2026, bilang kabahin sang pagbalik sa daan nga school calendar antes pa nag-abot ang COVID-19 pandemic.
