Ginpamaayo sang Pag-IBIG Fund ang ila Multi-Purpose Loan (MPL) agud mas daku na ang mahimo nga mahulam sang mga miyembro, mas mabuhin ang kinahanglan nga hulog antes mag-qualify, kag mas madamo sang pili-an nga repayment terms.
Sa interview sang Bombo Radyo kay Mr. Domingo Jacinto, Jr., Vice President sang PAG-IBIG Fund, iya ginpahayag nga sa idalum sang ginpAayo nga Pag-IBIG MPL, mahimo na nga makahulam ang mga miyembro sang tubtob 90% sang ila kabug-osan nga Pag-IBIG Regular Savings—mas mataas ini sang 12.5% kumpara sa una nga 80%.
Para sa mga miyembro nga naga-dugang kag naga-upgrade sang ila regular savings, posible pa gid nga magdaku ang ila mahimo nga mahulam bangud nakabase ini sa ila savings. Sa kabug-usan, mas daku ang mahimo nila nga ma-loan halin sa MPL para sa ila mga kinahanglanon.
Suno kay Jacinto, ini nga mga pagbago—mas daku nga loan kag mas dasig nga eligibility—ipatuman man sa iban nga Short-Term Loan programs sang Pag-IBIG pareho sang Health and Education Loan Programs (HELPS) kag Calamity Loan.
Luwas sa mas daku nga loan amount, ginpaubos man ang kinahanglan nga panahon para magin eligible ang isa ka miyembro.
Sa idalum sang ginbag-o nga programa, pwede na maka-loan ang mga aktibo nga miyembro nga may 12 ka bulan nga hulog sa Pag-IBIG—mas dasig ini kumpara sa anay nga requirement nga 24 ka bulan. Tungod sini, mas madamo nga miyembro ang mas temprano nga makabenepisyo sa pondo para sa ila nga kinahanglanon.
Samtang, ang mga miyembro nga may yara na sang existing loan halin sa daan nga guidelines mahimo gihapon mag-apply liwat sa enhanced MPL kon kinahanglan nila sang dugang nga cash bangud sang mas mataas nga loan entitlement. Ang mga ini nga pagbago mangin available umpisa Mayo 16.
Kaupod man sa mga pagbago sa Pag-IBIG MPL amo ang bag-o nga one-year repayment term bilang dugang nga opsyon sa existing nga two kag three-year terms. Nagahatag ini sang dugang nga flexibility sa mga miyembro agud mas mapasadya nila ang ila bayad sa loan suno sa ila financial capacity.
