Ginaduso sa Iloilo Provincial Board ang ordinansa kun sa diin nakabutang nga hatagan sang padya ang mga tawo nga makahatag sang impormasyon agud madakpan kag makasuhan ang mga indibidwal nga naga-engage sa iligal nga droga.
Ang author sini amo si 2nd District Board Member June Mondejar, chairman sang Committee on Public Order and Safety.
Sa interview sang Bombo Radyo kay Mondejar, iya ginpahayag nga tuyo sini nga ordinansa nga mapabaskog pa kag himuon nga mas epektibo ang kampanya batok sa illegal drugs.
Sa idalom sini nga ordinansa, makabaton sang P10,000 ang makahatag sang tip nga maga-resulta sa pagka-aresto sang residente nga involved sa iligal nga droga.
P20,000 naman ang mabaton sang informant nga maga-resulta sa pagka-aresto sang barangay kagawad ukon SK official.
Kun punong barangay naman ang involved sa droga kag siya ang itudlo, mahatagan sang P30,000 nga reward ang informant.
Iga-release lamang ang insentibo kun mapasaka na ang kaso batok sa gin-report nga residente ukon opisyal.
Ang isa ka kuwalipikasyon agud mangin informant amo nga dapat myembro ini sang Barangay Bantay Droga.
Ang Barangay Bantay Droga amo ang unit nga ginaduso nga tukuron para nga ma-monitor kag ma-report ang illegal drug activities sa lebel sang barangay.
Malakip sa sini nga unit ang barangay officials, Sangguniang Kabataan (SK) officials, volunteer workers, barangay tanods, health workers, nutrition scholars, service point officers, kag daycare workers.
Na-istoryahan man suno kay Mondejar nga ilakip man ang mga tiglawas halin sa civil society organizations nga naga-assist sang law enforcement.
Agud mas mapasangkad ang involvement sang komunidad, tugutan man ang partisipasyon sang halin sa grupo sang transportasyon kaangay sang mga asosasyon sang naga-dala sang mga motorsiklo kag tricycle.
Ginduso ini nga ordinansa suno kay Mondejar agud nga mas mapabakod pa ang mekanismo ilabi na nga nagapadayon gihapon ang illegal drug activities apisar pa may yara sang Barangay Anti-Drug Abuse Councils (BADAC).
Nahibaluan nga sang nagligad nga tuig tubtub sa temprano nga bahin sang 2026, asud-asud ang drug buy bust operations sang mga pulis sa probinsya kun sa diin ang nagkaladakpan amo mismo ang barangay officials.#
