Nakumpiskar sang kapulisan ang P1.46-million nga balor sang ginapasuni shabu halin sa duha ka subject sa drug buy bust sa Barangay Batad Viejo, Batad, Iloilo.
Ang mga nadakpan amo sanday alias Iris, 36, residente sang Gines Nuevo, San Enrique; kag alias Pani, 25, residente sang amo man nga barangay.
Suno sa report sang Provincial Drug Enforcement Unit (PDEU), una nga nabaklan sang police poseur-buyer sang isa ka sachet ang mga suspek.
Sa dugang nga pagpangusisa sang awtoridad, na-recover ang kabug-usan nga 215 gramos sang suspected shabu nga may estimated drug price nga lab-ot sa P1,462,000.
Gindala na ang mga arestado sa Batad Municipal Police Station samtang ginahikot ang ipasaka nga criminal charges.
Suno sa PDEU nga ginapangunahan ni Police Major Dadje De Lima, napunggan ang kuntani distribusyon sang iligal nga droga sa 3rd, 4th, kag 5th districts sang probinsya bangud sa pagka-aresto sang amo nga High Value Individual kag Street Level Individual kag pagkumpiskar sa ila dala nga suspected shabu.
“The successful buybust operation was the result of a focused sustained intelligence collection, target validation, surveillance, and close coordination between confidential informant and operating units,” suno pa sa report sang PDEU.
