Ginatudlo sang Philippine Drug Enforcement Agency (PDEA) ang isa ka politiko halin sa Mindanao nga naghatag sang pondo para sa private plane nga gamiton kuntani sa pagpasulod sang P3.5-billion nga balor sang ilegal nga droga halin sa Laos pakadto sa Pilipinas.
Sa statement ni PDEA spokesperson Joseph Frederick Calulut subong nga adlaw, Oktubre 15, wala anay ginhingalan ang nasambit nga politiko, apang gin-alegar nga nagakontra ini sa administrasyon ni Presidente Ferdinand “Bongbong” Marcos Jr.
“We identified him during our investigation after nung mangyari yung incident na yun… Base doon sa investigation namin ng task group, lumabas nga na itong pulitikong ito ang nagbigay ng pondo para doon sa pag charter nung flight,” suno kay Calulut.
“According to our investigation, he’s a politician from the south. This person is a politician from the south. [His] political party is against the current administration,” dugang niya.
Nagapadayon pa ang imbestigasyon kag pagtipon sang mga ebidensya.
Ginalantaw nga posible nga mapasakaan sang kaso ang nasambit nga politiko kag ang iban pa sini nga ginatudlo nga mga kahimbon.
Matandaan nga na-recover sang mga awtoridad sa Laos ang 521 kilograms sang ginapatihan nga methamphetamine hydrochloride ukon shabu halin sa isa ka pribado nga eroplano sa Luang Prabang International Airport. Sang ulihi, nakumpirma nga pakadto kuntani ini sa Pilipinas.
Duha ka Pilipino ang nadakpan may kaangtanan sa insidente.
Suno sa PDEA, na-track na sang mga awtoridad ang mga transaksyon nga may kaangtanan sa operasyon kag natumod ang iban pa nga mga suspek.
Ang isa sa mga Pilipino nga suspek nga ginakilala sa alyas nga “Fahad” ang ginapahayag nga nagapuyo sa Marawi.
Nauna na nga ginpahayag sang Civil Aviation Authority of the Philippines (CAAP) nga nakarehistro sa Estados Unidos ang gin-arkilahan nga pribado nga eroplano.
Pahayag pa sang PDEA, gina-usisa nila ang possible drug syndicates nga naangot sa Laos case.
“May mga na-track na kami, we’ve identified the other players, yung kanilang cohorts na-identify na rin,” dugang ni Calulut.#
