Nag-abot na si eight-division legend Manny Pacquiao sa Estados Unidos sang Amerika agud umpisahan ang training para sa iya natalana nga pagbalik sa hampang.
Kaupod ni Pacquiao sa Los Angeles, California ang iya asawa nga si Jinkee kag iya anak nga si Jimuel nga didto na nga daan sa amo nga state. Yara man sa flight ang abyan sini kag trainer nga si Buboy Fernandez.
Amo ini ang ginalantaw nga pag-umpisa sang duha ka bulan nga paghanas sang Pinoy boxer, apang wala pa sang kumpirmasyon kun makaupod sini si Coach Freddie Roach sa Wild Card Boxing Club sa Hollywood ukon magasaylo sa lain nga training facility.
Natalana nga mag-atubang si Pacquiao kay defending World Boxing Council (WBC) welterweight champion Mario Barrios sa Hulyo 19, 2025 sa Las Vegas, Nevada.
Sang nagligad nga semana nagpaguwa sang latest ranking ang WBC.
Gin-lista ang 46-anyos nga Filipino southpaw sa numero singko sa 147-pound class apisar nga indi na ini aktibo sa boksing halin pa sang Agusto 2021 sang nalutos siya sa hampang sa idalom sang World Boxing Association.
Base sa nauna nga reports, may plano man nga ibutang ang anak ni Pacquiao nga si Jimuel sa professional boxing sa undercard sang Barrios fight.
Antes ang pagbalik sa ring, natalana anay nga magpahuway ang amay nga Pacquaio sa training kag magatambong ini sa enshrinement sa iya sa International Boxing Hall of Fame sa Canastota, New York.
