Nagpangaduha sa May 2025 Chemical Engineer Licensure Exam ang isa ka produkto sang University of the Philippines Visayas-Iloilo City.
Ini amo si Aaron Paul Infante nga may rating nga 88.50%.
Magluwas diri, sandig sa resulta nga gin-release sang Professional Regulation Commission subong nga gab-i, nagapanguna man ang UP Iloilo City sa top performing schools nga may 100% nga passing rate. 23 sa 23 examinees halin sa amo nga eskwelahan ang nakapasar.
Nagapang-apat naman sa lista ang Central Philippine University matapos 12 sa 13 ka examinees halin sa amo nga unibersidad ang nakapasar ukon katumbas sang 92.31% nga rating.
Base sa PRC, kabug-usan nga 799 ka mga indibidwal ang nagkuha sini nga exam subong nga bulan, apang 602 lamang ang nakapasar.
Ginpatigayon ang Chemical Engineering board exams sang May 21-23, 2025, sa PRC testing centers sa NCR, Baguio, Cagayan de Oro, Cebu, Davao, Iloilo, Legazpi, Lucena, kag Rosales.
