Pilason ang isa sa pito ka miyembro sang magpamilya matapos madisgrasya ang ila ginasakyan nga salakyan sa Barangay Sinapsapan, Jordan, Guimaras.
Sa interview sang Bombo Radyo kay Police Captain Kevin Bacongallo, hepe sang Jordan Municipal Police Station, iya ginpahayag nga naghalin sa isa ka beach resort ang magpamilya kag pauli na kuntani sa ila balay sa Baragay Bata, Bacolod City.
Suno kay Bacongallo, pag-abot sa tulokadon nga dalan sang Sinapsapan, napatay ang makina sang salakyan rason nga nadulaan ini sang control, nagdalausdos kag nabunggo sa puno sang kahoy.
Bangud diri, nakaagum sang menor nga pilas ang isa sa ila samtang luwas naman sa katalagman ang 6 pa lakip na ang driver.
Gilayon man ini nga gindapatan sang pagbulong sa malapit nga ospital kag natigayon man nga nakapauli sa ila sa Bacolod City.
