Ginakabig sang Iloilo City Engineer’s Office nga makaalarma ang madasig nga pagtaas sang tubig-baha sa syudad kasunod sang tayuyon nga pagtupa sang ulan kagab-i.
Sa interview sang Bombo Radyo kay Mr. Joel Gerasmia, Chief of Staff sang Iloilo City Engineer’s Office, iya ginpahayag nga nagpatawag na sang coordination meeting si Iloilo City Mayor Jerry Treñas sa Department of Public Works and Highways (DPWH) Region 6 lakip na diri sa nagtambong amo ang City District Engineering Office (CDEO).
Suno kay Gerasmia, ginsapolan ang pagbaha-baha sa syudad agud matumod ang mayor nga problema.
Ginpahayag man sini nga isa sa rason sang madasig nga pagsaka sang tubig-baha kag mahinay nga pag-subside sini sa Distrito sang Jaro amo bangud sa construction sang esplanade kon sa diin, natabunan kag wala na liwat mabuksan ang pila sa mga ginaguwaan sang tubig.
Dugang ni Gerasmia nga kasunod sang pagsinapol, magapatigayon sang ‘walk through’ ang talatapan sa Huwebes, Mayo 29, agud masekyar ang mga lugar nga ginbaha.
Magasugod ini sa Huervana St. La Paz, padulong sa Rizal Creek nga masami ginabaha.
Lakip sa maga-upod sa aktibidad ang DPWH Region 6 kag ang City District Engineering Office.
Ginlaragway man sang natungdan nga pagabuksan ang pila ka drainage kag suhoton sang ila mga personnel ukon ang declogging team.
Nagpasalig man ang City Engineer’s Office nga tayuyon ang declogging operation kon sa diin, may mga deployment sa mga lugar nga may report sang pagbaha.
