Nagtipon ang Duterte supporters sa atubang sang International Criminal Court (ICC) sa The Hague, Netherlands agud magpanawagan sa tribunal nga hilwayon kag papaulion na si former President Rodrigo Duterte.
Ini nga rally ang ginapangunahan ni Vice President Sara Duterte nga naga-selebrar man sang iya 47th birthday subong nga Mayo 31.
Gin-organisar sang Filipino communities sa Europa ini nga aktibidad.
Kahapon, sa iya pag-abot sa The Hague, nakabisita na si Sara sa iya amay kun sa diin kaupod sini ang iya iloy nga si Elizabeth Zimmerman. Ginpakigbahin sini ang mga mensahe sang former president, lakip na ang pahayag sini nga maga-sumpa siya bilang mayor sang Davao City kun hilwayon siya sang korte.
Nahibaluan nga Mayo 30, Hunyo 2, kag Hunyo 3 ang scheduled visits ni Sara sa iya amay sa detention facility sandig sa impormasyon nga gin-release sang Office of the Vice President (OVP).
Nag-upod man sa byahe sang bise presidente sa The Hague si presidential sister Imee Marcos, apang ginklaro sang VP nga wala ini sang papel sa kaso sang amay nga Duterte.
Antes nag-abot sa The Hague, nagbisita anay ang vice president sa Qatar kag nagpakigkita sa Filipino community nga mainit man nga nag-abi-abi sa iya.
Marso 11 sang gindakop si former President Duterte sa gahum sang arrest warrant sang ICC bangud sa kaso sini nga crimes against humanity nga ginpahayag nag-ugat sa iya maduguon nga implementasyon sang drug war.
Natalana ang confirmation of charges sa Septyembre 23, 2025.#
