Nakatalana ang 13 ka mga eskwelahan sa Iloilo nga magasugod sa pilot run sang revised Senior High School (SHS) curriculum sang basic education program subong nga School Year 2025-2026.
Sa interview sang Bombo Radyo kay Leonil Salvilla, Spokersperson sang Department of Education (DepEd) Schools Division of Iloilo, iya ginpahayag nga i-implementar ang bag-o nga mga programa sang Senior High School sa Guimbal National High School, Iloilo National High School, Oton National High School, San Rafael National High School, Cabanbanan National High School, Leganes National High School, Anilao National High School, Sta Rita National High School, Deogracias G. Arlos National High School, Sara National High School, Polopiña National High School, Dela Paz National High School, kag Bulalacao National High School.
Suno kay Salvilla, sige-sige ang pagsinapol agud nga mapatuman ang implementasyon sa masunod nga school year sa masobra 170 nga secondary schools sa Iloilo.
Antes nagdesisyon nga ipatuman sa 13 ka secondary schools ang amo nga tikang, nagpatuman sang application kag assessment ang talatapan sa tagsa ka mga eskwelahan agud matumod kon handa gidman sila nga magpatuman sang strengthen Senior High School Program.
Dugang sini nga isa sa mga key features sang bag-o nga kurikulum amo ang pagbuhin sang mga panguna nga mga subject gikan sa 15 nga ginatanyag kada semester, pakadto sa lima lamang nga igatanyag sa bug-os nga tuig sa Grade 11.
Ining lima ka bag-o nga mga subject amo ang: Effective Communication (Mabisang Komunikasyon), Life Skills, General Mathematics, General Science, and Pag-aaral ng Kasaysayan kag Lipunang Pilipino.
Nahibaluan nga masobra 800 ka mga eskwelahan sa bug-os nga pungsod ang natalana nga mag-intra sa pilot run sang ginbag-o nga kurikulum sang SHS.
Samtang, sa ginpatigayon nga House Committee on Basic Education and Culture briefing, una nga ginlista sang central office sang DepEd ang 727 ka mga buluthuan ang ginklasipikar nga “highly ready” nga malakip sa trial sang “strengthened” program para sa Grades 11 kag 12.
Samtang, ang 841 ka mga pilot schools nagarepresentar sang 6.60% sang 12,739 ka kabug-usan nga mga eskwelahan sang SHS sa bug-os nga pungsod.
Sa sini nga 841 ka mga eskwelahan, 580 ang pampubliko kag 261 ang pribado. 806 sang learning institutions ang naghalin sa urban areas, samtang 35 ang gikan sa mga kaumhan ukon rural areas.
