Ginakabig sang Iloilo National High School nga isa ka dako nag pagbag-o ang revised Senior High School (SHS) curriculum sang basic education program para sa School Year 2025-2026.
Sa interview sang Bombo Radyo kay Delora Cecilla Fantillo, Principal sang Iloilo National High School, iya ginpahayag nga ang sa subong nga SHS Program ang magahatag sang kasulyahan sa mga esdtudyante kon ikumpara sa anay nga programa nga mas mabug-at.
Suno kay Fantillo, nagpaidalom naman sa training ang pila ka mga manunudlo agud nga mapatuman sang matalunsay ang revised curriculum.
Dugang sini nga ang apat nga strands sang-una sa Senior High School, mahimo na lang subong nga duha ka tracks.
Ginpahayag man ni Fantillo nga halin sa pulo tubtob onse ka mga subjects, mahimo na lang ini subong nga pito.
Para sa natungdan, mas mag-an ini sa mga estudyante.
Nahibaluan nga ang Iloilo National High School ang lakip sa 13 ka mga eskwelahan sa Iloilo nga magasugod sang pilot run sang revised Senior High School curriculum.
