Nagdugang pa ang lista sang mga eskwelahan nga nagapanawagan sa Senado nga mag-umpisa na sa impeachment trial batok kay Vice President Sara Duterte.
Isa diri ang University of Santo Tomas (UST) nga nag-post kaina sang hapon nga tahuron ang Konstitusyon, himuon ang katungdanan, kag mga tinaga nga “Forthwith proceed.”
“Respect the Constitution. Fulfill the duty. Forthwith proceed. Veritas,” suno sa statement sang unibersidad.
Antes sini, may kaangay man nga panawagan ang mga dean sang lima ka Ateneo schools and colleges of law nga amo ang Ateneo de Manila University, Xavier University-Ateneo de Cagayan, Ateneo de Davao University, Ateneo de Zamboanga University, kag Ateneo de Naga University.
Suno sa statement sang deans, dapat nga insigida ang trial sang Senado nga wala na sang kondisyon ukon kuwalipikasyon, kag wala sang “equivocation or obstruction” matapos nga na-file na kag napasa sang Kamara ang articles of impeachment.
Ginpunto man sang mga dean nga ang Senado isa ka “continuing body” bilang isa ka impeachment court nga isa ka quasi-judicial function nga buot silingon indi makonsiderar nga legislative function nga maga-expire sa kada magtakop ang Congress.
Magluwas sa sini nga mga eskwelahan, ang De La Salle University (DLSU) ang may kaangay man nga panawagan sa Senado nga pareho sa 19th kag sa incoming 20th Congress.
Madumduman man nga masobra 100 faculty members sang University of the Philippines College of Law ang nagduso man sa Senado nga indi pag-i-abandonar ang ila nga constitutional duty nga magpadayon sa sini nga impeachment trial.
Hunyo 2 kuntani ang presentasyon sang Articles of Impeachment sa Senado apang ginsaylo ni Senate President Chiz Escudero sa Hunyo 11 — desisyon nga nagpasaka sang suspetsa sang iban kun madayon pa ang trial sa upper chamber.#
