Magapanubo ang Department of Agriculture (DA) sang suggested retail price (SRP) sang imported nga bugas sa P43 kada kilo umpisa Hulyo 1, halin sa P45.
Santo ini sa mando ni Presidente Ferdinand Marcos Jr. nga padayunon niya ang pagpangita sang paagi agud mapamag-an ang gasto sang mga Pilipino ilabi na sa bugas.
Suno kay DA Secretary Francisco Tiu Laurel Jr., ang tikang sabat sa pagpanubo sang presyo sang bugas sa global market kag gin-umpisahan na ini sang Enero, agud magpabatyag sang epekto sang plano nga pagpanaug sang rice tariff halin 35% pakadto 15% sa Hulyo.
Ang inisyatibo nga ini kabahin sang kampanya nga “Benteng Bigas, Meron Na!” nga nagatuman sa promisa ni Presidente Marcos nga maghatag bugas sa presyo nga P20 kada kilo.
Ang pilot run sang P20 rice program magalawig tubtob Disyembre kag target nga maghatag sang benepisyo sa 14 milyones nga low-income kag at-risk nga mga Pilipino kag minimum wage earners.
Nagmandu man si Presidente Marcos sa DA nga ipadayon ang P20 kada kilo nga bugas nga programa tubtob matapos ang iya termino sa Hunyo 2028.
Samtang, ginmando ni Speaker Ferdinand Martin G. Romualdez ang mga policy kag budget experts sang House of Representatives nga himuon ang maid-id nga pag-review sang posibilidad nga himuon nga national policy ang P20 kada kilo nga bugas nga programa.
Ginpahayag man ni Romualdez nga pagahandaan sang Kamara nga mag-draft sang hagna agud ma-institutionalize ang programa, nga ginlantaw niya nga isa ka importante nga tikang sa long-term food security kag economic relief para sa minilyon nga Pilipino.
