Padayon ang pagpaninguha ni Iloilo City Mayor Jerry Treñas sa pagpangita sang epektibo nga solusyon sa problema sang pagbaha sa pila ka mga parte sang syudad.
Sa interview sang Bombo Radyo kay Treñas, iya ginpahayag nga nagpatigayon siya sang meeting upod ang pila ka mga ahensya sang lokal nga gobyerno agud istoryahan kag usisaon ang mga rason sang pagbaha, labi na kun magbubo ang mamunog nga ulan.
Una na nga gintutukan ang La Paz area matapos makabaton sang madamo nga reklamo halin sa mga residente, partikular sa isyu sang drainage system.
Suno kay Mayor Treñas, nabuksan na ang pila ka mga ginpangsiraduhan nga drainage sa Divinagracia, La Paz, bangud may yara na sang nahamtang nga pumping station sa Libertad area nga magbulig suyop sang tubig.
Ginalantaw man sang alkalde nga isa sa mga rason sang pagbaha amo ang madamo nga mga pamalay kag taytay sa palibot sang Rizal Creek sa La Paz, kun sa diin mabudlay magguwa ang tubig.
Gin-athag man sang alkalde nga may yara na sila sang mga plano nga paga-islan ang mga daan nga drain inlets kag magdugang sang mga pumping station nga konektado na sa kuryente.
Sa subong, padayon ang koordinasyon sang lokal nga gobyerno sang Iloilo sa pagresolbar sang problema nga nagaapekto sa seguridad kag kahilwayan sang mga pumuluyo.
