Nagpalupad ang Russia sang masobra 500 ka drones kag 11 missiles sa Ukraine inoras lang matapos ang pag-istoryahanay nanday US President Donald Trump kag Russian President Vladimir Putin.
Suno sa Ukrainian Air Force, isa ang patay kag 23 ang pilason bangud sang drone attack sang Moscow.
Nahalitan man ang 40 apartment blocks, passenger railway infrastructure, lima ka mga eskwelahan, mga cafe, kag mga salakyan sa 10 ka mga distrito sa Kyiv. Naigo man pati ang consular section sang embahada sang Poland sa central nga bahin sang kapital sang Ukraine.
Suno kay Ukrainian Foreign Minister Andrii Sybiha, may yara sang Chinese component nga nakit-an sa isa sa Shahed drones nga nag-atake sa Kyiv.
Temprano pa sa gab-i tubtub sa kaagahon nga naghuni ang mga sirena sa palibot samtang nagpanago naman ang mga pumuluyo sang Kyiv sa underground metro stations.
“Absolutely horrible and sleepless night in Kyiv. One of the worst so far,” suno kay Ukrainian Minister of Foreign Affairs Andrii Sybiha. Gintawag naman ini ni Ukrainian President Volodymyr Zelensky nga “one of the most large-scale air attacks” nga na-eksperyensyahan sang ila nga pungsod.
“Notably, the first air raid alerts in our cities and regions yesterday began to blare almost simultaneously with media reports discussing a phone call between President Trump and Putin,” suno kay Zelensky. “Yet again, Russia is showing it has no intention of ending the war and terror.”
Sunod nga nag-istoryahanay sanday Trump kag Zelenskyy kun sa diin nakasugtan nga mas pabakuron ang kapasidad sang Kyiv nga depensahan ang ila nga airspace. Na-istoryahan man ang joint defense production amo man ang joint purchases kag investments.
Una na nga ginplastar sang Russia Defense Ministry nga ang drone factories, military airfield kag oil refinery amo ang ila gina-target nga iguon sa Ukraine.#
