Padayon nga ginaduso sang Iloilo City Traffic and Transportation Management Office (ICTTMO) ang mga kooperatiba nga magdugang sang biyahe sa gab-i agud masiguro nga may masakyan ang mga pasahero nga nagauli sa ‘late’ nga oras.
Sa interview sang Bombo Radyo, ginpahayag ni Ret. PCOL. Uldarico Garbanzos, hepe sang ICTTMO, nga may yara na sang mga aplikasyon nga na-submit kag gin-endorso sa opisina, lakip na sa Committee on Transportation.
Ginausisa subong ang mga datos kag papeles nga basehan sa paghatag sang dugang nga authorized units sa kada Transport Operators and Drivers Association (TODA).
Ginaengganyo man sang ICTTMO ang mga aplikante nga klaruhon kun diin nga TODA sila naga-aplikar bangud may yara pa sang mga ginapauswag nga ruta nga kabahin sang livelihood program sang syudad.
Ang sini nga tikang ginahingyo nga sundon agud mangin legal kag organisado ang operasyon sang transportasyon sa Iloilo City labi na sa gab-i.
