Nagdangat sa 69 ka mga tawo ang napatay kag 11 ka iban pa ang missing kasunod sang daku nga sunog sa hypermarket sa al-Kut city sa southern Iraq.
Sa inisyal nga imbestigasyon, nagsugod ang sunog sa panalgan sang “Corniche Hypermarket” building kun sa diin may yara sang perfumes kag cosmetics nga ginabaligya.
Makit-an sa videos ang mga tawo nga nagasaka na sa atop sang building samtang nagabulig ang mga bumbero kag rescue teams nga maluwas sila sa insidente.
Samtang ginapreparar na ang iban nga mga bangkay para sa lubong, may iban naman nga nagakinahanglan pa sang DNA test para ma-identify sila sang ila nga mga pamilya.
Nagmando naman si Prime Minister Mohammed Shia al-Sudani sang insigida kag madalom nga imbestigasyon para sa rason sang insidente kag agud mahibaluan kun ano ang nangin kakulangan sang mall. Sa statement sang opisina sang opisyal, may yara man sang ginpanawagan nga national mourning.
Nahibaluan nga may kakulang sa safety measures sa Iraq nga nagatuga sang madamo nga casualties sa kada sunog. Sang 2023, matandaan nga masobra man sa 100 ang patay sang nasunog ang isa ka wedding hall sa northern town sang amo man nga pungsod.
