Tatlo ang patay kag napulo ka mga tawo ang nasamaran sang ginbombahan sang Israel ang isahanon nga Catholic Church sa Gaza.
Base sa kumpirmasyon sang Catholic charity nga Caritas Jerusalem, lakip sa mga napatay amo ang 60-anyos nga janitor sa parokya kag ang isa ka babaye nga ginahatagan sang psychosocial support sa sulod sang Caritas tent sa amo nga Church compound.
Nalakip naman sa pilason ang pari nga si Reverend Father Gabriel Romanelli.
Ini nga Holy Family Catholic Church ang nangin dalangpan sang ginatos ka mga Palestino sa nagligad nga 21 ka bulan nga gyera sa tunga sang Israel kag Hamas militants. Pareho nga mga Kristiyano kag Muslim ang nagapanago sa compound sang simbahan, lakip na ang pila ka mga kabataan nga may kasablagan.
Nagpangayo sang pasaylo ang Israel kag nagpahayag nga maga-imbestigar ini. Pahayag pa sang militar sang Israel, nagahimo ini sang “feasible effort” nga malikawan nga mahalitan ang mga sibilyan kag civilian structures lakip na ang religious sites.
Indi kinaandan nga naga-sorry ang Israeli Foreign Ministry, apang sa latest post sini sa social media, nagpaguwa ini sang apology: “Israel expresses deep sorrow over the damage to the Holy Family Church in Gaza City and over any civilian casualty.”
Sa statement naman ni Pope Leo XIV, ginsulit sini ang panawagan sang gilayon nga pagpatuman sang ceasefire sa Gaza. Ginahingyo sini ang “dialogue, reconciliation and enduring peace” sa Middle East. Nagpabutyag man ang Santo Papa sang kasubo sa nadulaan sang kabuhi kag sa mga nasamaran bangud sa amo nga military attack.
Nahibaluan nga sang buhi pa si Pope Francis, masami gid ini nga nagatawag sa amo nga Parokya agud nga kamustahon sila sa tunga sang gyera. Ginalakip man sini ang Gaza sa pagpangamuyo sa kada pagtapos sang iya misa sa kada Domingo.#
