Nadugangan pa ang numero sang mga napatay sa paglaslas sang bagyo Crising kag Southwest monsoon ukon Habagat sa pungsod.
Base sa data sang National Disaster Risk Reduction and Management Council (NDRRMC) sini nga adlaw, Hulyo 21, nagsaka na sa anom ang napatay sa kalamidad halin sa apat nga na-record sa nagligad nga adlaw.
Suno sa ahensya, nagtaas man ang numero sang na-record nga napilasan samtang nagapadayon naman ang validation sa iban pa nga casualties.
Naglab-ot naman sa kabug-usan nga 800,864 ka mga indibidwal ang apektado halin sa masobra 1,000 ka mga barangay, sa diin may kabug-usam nga 5,921 ka mga pamilya ang temporaryo nga nagatenir sa evacuation centers.
Samtang, may yara naman sang 16,671 ka mga pamilya ang yara sa saguwa sang evacuation centers.
Sa subong, apisar nga nakaguwa na sa pungsod si Crising, padayon sa gihapon nga ginabantayan ini nga Severe Tropical Storm Wipha, amo man ang low pressure area (LPA) nga yara sa sulod sang Philippine Area of Responsibility (PAR).
Base naman sa data sang Philippine National Police (PNP) nga magluwas sa mga napatay, anom ka iban pa ang nagapabilin nga missing.
Suno kay PNP chief Police General Nicolas Torre III, naka-rescue sila sang 276 ka tawo samtang masobra 35,000 ka indibidwal ang nahatagan nila sang bulig sa mga evacuation center.
Pahayag ni Torre nga sa subong, padayon ang ila pagpakig-angut sa mga local government unit kag iban pa nga ahensya sang gobyerno agud masiguro ang kahilwayan sang tanan nga mga Filipino ilabi sa nga tion sang kalamidad.
