Nagdangat sa 18 ka mga tawo ang napatay kag masobra 160 ang nasamaran sang nagtibusok ang training aircraft sang Bangladesh Air Force sa isa ka eskwelahan sa Dhaka nga amo ang kapital sang pungsod.
Suno sa militar, nag-crash ang Air Force F-7 BGI aircraft sa campus sang Milestone School and College sa Uttara sa Dhaka sang Lunes sang hapon (local time).
Sang amo nga tion suno sa awtoridad, nagakuha sang test kag naga-attend sang regular classes ang mga estudyante.
Indi pa klaro kun ano gid ang rason sang insidente, apang sa inisyal nga pahayag, 1:06 sang hapon ang take-off apang gilayon nga nagkalayo bangud sang mechanical fault.
Base sa inisyal nga pahayag sang armed forces, lakip sa napatay amo mismo ang piloto nga si Flight Lieutenant Md. Taukir Islam.Ginpahayag man sang armadong-kusog sang Bangladesh nga gintinguhaan pa kuntani sang piloto nga mapalikaw ang aircarft sa less populated area matapos natabo ang mechanical fault.
Sandig naman sa National Institute of Burn and Plastic Surgery, masobra 50 ka mga pasyente ang gindala sa ila nga pasilidad lakip ang mga kabataan. Nagapadayon pa ang rescue operations.#
