Ginpahayag ni US President Donald Trump nga nagsugtanay na ang mga lider sang Thailand kag Cambodia nga magsapol agud istoryahan ang ipatuman nga ceasefire, kasunod sang tatlo ka adlaw nga madugo nga engkwentro sa tunga sang ila mga pwersa, nga nagtuga sang kamatayon sang kapin 30 ka tawo.
Sa iya social media post halin sa Scotland, ginpahayag ni Trump nga gin-istorya niya ang lider sang duwa ka pungsod kag ginpaandaman nga indi sila makakuha sang favorable trade agreements sa Amerika kun magapadayon ang gyera.
Suno kay Thailand Acting Prime Minister Phumtham Wechayachai, naga-ugyon sila sa prinsipyo sang ceasefire apang gusto nila sang sinsero nga lihok halin sa Cambodia.
Kasunod sini, ginahingyo man ni Phumtham kay Trump nga estoryahon ang Cambodia nga mag-agree sa bilateral talks.
Nagpahayag man sang kabalaka ang United Nations kag ASEAN sa posibilidad sang paglala sang sitwasyon sa border.
Sa pihak sini, padayon nga nagabangigay ang duha ka pungsod kun sin-o ang una nga naglunsyar sang atake.
Matandaan nga nag-ugat ang away sang duha ka pungsod bangud sa madugay nga wala sang pag-ilintindihanay sa border sini, particular sa mga lugar kun sa diin nahamtang ang mga sinang-una nga templo sang Hindu kaangay sang Preah Vihear nga anay nangin sentro sang away sang 2008.
Sa pihak sang anunsyo ni Trump, wala pa sang detalye nga ginpagguwa angot sa kun san-o kag sa diin matabo ang pag-estoryahanay sang duka ka mga pungsod.
