Patay ang tatlo ka tuig nga bata matapos malapakan sang grader sa Barangay Umilig, Buenavista, Guimaras.
Sa interview sang Bombo Radyo kay Police Captain Rene Mercado, hepe sang Buenavista Municipal Police Station, iya ginpahayag nga ginsugat sang amay ang iya mag-iloy sakay sa ila motorsiklo agud kuntani nga magkaon sa fast food, sang pag-abot sa amo nga barangay, may ginsipa nga bukol sang niyog ang iya amay kag nagtupa ini sa panguna nga goma sang motor rason nga nadulaan ini sang control.
Bangud sa impact, nagtabog ang iya mag-iloy kag ang biktima nagtupa sa way sang grader nga nagasumalang padulhog kag natapakan ini.
Suno kay Mercado, may mga nagsinggit pa kuntani sa driver sang grader apang ulihi na niya ini natalupangdan.
Ginhingagaw pa ini dala sa malapit nga ospital apang gindeklara man nga dead on arrival.
Sa subong, yara na sa kustodiya sang kapulisan ang driver sang grader kag nakatalana nga pasakaan sang kaso nga Reckless imprudence resulting to homicide.
By: 𝑩𝒐𝒎𝒃𝒐 𝑯𝒂𝒏𝒏𝒂 𝑨𝒏𝒅𝒂𝒔𝒂
