Ginpanugyan sang Department of Health (DOH) nga yara sa peligro ang masunod nga henerasyon sang kabataan sa Pilipinas bangud sang padayon nga pagsaka sang kaso sang Human Immunodeficiency Virus (HIV), nga posible maglaton sa krisis kun indi maagapan.
Sa interview sang Bombo Radyo kay Dr. Loyd Brendan Norella, HIV Program Manager sang Family Planning Organization of the Philippines (FPOP), iya ginpahayag nga bisan wala pa man nalab-ot ang national threshold sang kaso, ang pagdamo sang HIV infections sa mga vulnerable nga sektor, partikular sa mga naga-edad 15 tubtob 25, isa ka daku nga problema nga kinahanglan tutukan subong pa lang.
Ginbuyagyag man ni Norella sa ginpatigayon nga HIV Town Hall nga padayon nga ginakabig nga problema ang kakulang sa Comprehensive Sexuality Education (CSE), limitado nga akses sa contraceptives, kag ang stigma nga naga-pabilin sa komunidad. Ini nga mga kabudlayan, suno sa iya, nagapugong sa mga kabataan nga makabaton sang insakto nga impormasyon kag proteksyon kontra sa HIV.
Base sa datos sang DOH, naglab-ot sa 57 na ka bag-o nga kaso sang HIV ang narehistro kada adlaw. Suno sa AIDS Healthcare Foundation (AHF) Philippines, nagsaka na sa 500% ang kaso sa mga pamatan-on sa sulod lang sang isa ka tuig. Gani padayon ang panawagan sang AHF sa gobyerno nga magpagwa sang Executive Order nga magadeklara sang HIV bilang public health emergency sa bug-os nga pungsod.
Ginpunto man sang AHF nga kun padayon ang pagbalabag sa condom distribution, posible gid nga ang kabataan subong ang mangin biktima kag ang ila palaabuton nga kabuhi ang maapektuhan.
Reported By: Bombo Lyka Sandiego/ Via Zona Libre
